Amat-amat na nga naga-shift sa remote learning ang pila ka mga eskwelahan na sa Western Visayas bangud sa nagataas nga heat index.
Sa interview sang Bombo Radyo kay Mr. Hernane Escullar, Jr., spokesperson sang Department of Education Region 6, iya ginpahayag nga ginahatagan nila sang prayoridad ang ikaayong lawas sang mga estudyante sa tunga sang mainit nga panahon.
Suno kay Escullar, apektado sang mainit nga panahon ang pagtuon sang mga estudyante gani ginapakamaayo sang iban nga mga eskwelahan nga ipaiway anay ang face-to-face classes.
Nahibaluan nga nagadangat sa 1.9 million ang mga estudyante sa sekondarya sa bug-os nga rehiyon sa diin 1.7 million diri ang naga-eskwela sa public school,
Una naman nga ginmando ni Education Secretary Sonny Angara sa mga field offices kag mga eskwelahan nga maghimo sang preventive action kaangay sang pag-adjust sang class schedule, pagpatigayon sang alternative delivery modes kung kinahanglan, pagkaayo sang bentilasyon sa kada classroom kag pagbutang sang hydration stations.
Ginapanugyanan man ang mga eskwelahan nga likawan ang outdoor activities sa tion nga nagatagiti ang init, limitahan ang physical activities kag himuon ini sa may atop nga lugar.
Ginapasugtan man ang pagsuksok sang light kag kumportable nga uniporme para sa mga estudyante kag mga school personnel.
-𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗣𝗵𝗮𝘂𝗹𝗶𝗻𝗲 𝗣𝗶𝗹𝗹𝗼𝗿𝗮
