Ginkumpirmar ni Police Captain Eduardo Siacon Jr, ang station commander sang Jaro Police Station nga nagpa-blotter si Mayoral Candidate Salvador ‘Jun’ Capulot batok kay Punong Barangay Larry Palomo sang MH Del Pilar, Jaro, Iloilo City.
Ini kasunod sang mga indi manami nga mga tingaga nga ginbuy-an sang duha ka mga kampo matapos nga nagpatigayon sang caucus ang grupo nanday Capulot sa amo nga barangay.
Nauna naman ni ginpahayag ni PB Palomo nga siya ang gin harass kag ginpahog ni Capulot kag anay councilor Plaridel Nava.
Sa interview sang Bombo Radyo kay Siacon, iya ginpahayag nga ang kaundan sang blotter report ni Capulot amo ang oral defamation kag ginpahayag pagpaandan ukon pagpamahog ni Palomo.
Magahatag man sang assistance ang mga pulis kun magpasaka sang kaso ang duha ka mga partido.
Mas maayo man suno sa natungdan nga magpa-blotter man si PB Palomo agud nga may basehan ang iya mga alegasyon.
Sa interview naman sang Bombo Radyo kay Police Colonel Leo Batiles, direktor sang Iloilo City Police Office (ICPO), iya ginpahayag nga ang Philippine National Police (PNP) ang naga-provide sang area security kag police visibility agud nga mapabilin nga malinong ang mga ginapatigayon nga mga political activities sang mga nagkalain-lain nga partido sa syudad sang Iloilo.
Suno kay Batiles, ginalantaw man nga magsaka ang election status sang syudad bangud sa pila na ka mga insidente sang intense political rivalry.
Ini suno sa iya ang dapat nga likawan gid sang mga residente sang syudad agud nga mapabilin ini nga wala sang may narekord nga election related incidents.
Naghatag naman sang instruction si Batiles sa tanan nga station commanders nga mag-monitor sa mga ginapatigayon nga aktibidad sa ila tagsa ka area agud nga maalarma ang mga pulis kag makahatag sang assistance.
Mahimo man nga magpalab-ot sang mga panumbungon ang tagsa ka indibidwal kun may yara sang pagpamahog sa safety kag security sa pila ka mga campaign activities sa Iloilo City.
