Doble ang pagkadismaya sang pila ka mga residente sa Zone 6, Barangay Boulevard, Molo, Iloilo City bangud ginaalegar may mga tawo pa nga nagpangawat kadungan sang sunog nga natabo sa ila nga lugar.
Sa interview sang Bombo Radyo kay Richard Villanueva, residente sang nasambit nga barangay, iya ginpahayag nga nadula ang ila mga de-rasa nga manok kag mga speaker nga ginbutang sa ila nga salakyan.
Posible suno sa iya nga samtang nagaparik-parik sila sa pagsalbar sang ila nga mga kagamitan halin sa ila nga balay, naghingalit man ang mga kawatan sa sitwasyon kag nagtaban sang pila ka mga gamit.
Nagapati ang natungdan nga sa Barangay North Baluarte sa Molo naghalin ang mga kawatan.
Kagab-i, sang wala pa natapos ang sunog, may lagsanay pa nga natabo bangud gintinguhaan sang mga barangay tanod nga madakop ang tatlo ka mga suspek apang gilayon man sila nga nakapalagyo.
