PIER 15, SOUTH HARBOR, MANILA- Nagapabilin naman sa isa ka barko nga nagaserbe bilang quarantine facility ang iban nga mga stranded nga Ilonggo Overseas Filipino Workers sa Pier 15 South Harbor, Manila.
Sa interview sang Bombo Radyo kay Nieva Estante, isa sa mga na stranded nga OFW sa Manila, iya ginpahayag didto lang sila nagastay sa barko kag nakaquarantine.
Suno kay Estante, nag-abot sila nga mga OFW sa Manila sang nakaligad nga bulan sang Marso kag Abril , nga amo man ang mga binulan nga ginpatuman ang enhanced community quarantine.
Pahayag pa niya, nakapaidalom naman sila sa Covid-19 test sa diin nangin negatibo man ang resulta.
Natalana na sila kuntani nga magpauli diri sa Iloilo suno kay Estante, apang wala nadayun bangud may yara sang narekord nga positive cases sa una nga batch sang mga nagpauli nga repatriated OFW’s.
