ILOILO – Ginkakibot ni Iloilo 2nd District Board Member Jun Mondejar nga may yara sang ghost employees sa Iloilo Provincial Capitol.
Sa interview sang Bombo Radyo kay Mondejar, iya ginpahayag nga wala siya sang ihibalo tuhoy sa nasambit nga isyu kun wala nabalahuba ang tuhoy diri.
Suno kay Mondejar, mas maayo nga makapaathag si Liga ng mga Barangay President Dorothy Paes nga amo ang sentro sang kontrobersiya apang tubtub subong, wala pa nakahatag sang iya opisyal nga pahayag.
Ginpahayag ni Mondejar nga wala sa iya sang problema kun ipatawag ang tanan nga empleyado nga yara sa iya opisina bilang kabahin sang imbestigasyon sang Commission on Audit.
May kaangtanan diri, ginpahayag naman ni Gov. Arthur Defensor Jr. nga indi na bag-o ang pagpatigayon sang imbestigasyon sang Commission on Audit sa mga empleyado sang Iloilo Provincial Capitol.
Suno kay Defensor, regular nga nagapatigayon sang imbestigasyon ang Commission on Audit agud hibaluon kun bala lunsay lehitimo nga empleyado ang gina-swelduhan sang gobyerno.
Para naman kay Vice Gov. Christine Garin, may duha ka sahi ang empleyado sa Iloilo Provincial Capitol nga ginalakipan sang Plantilla kag Under the Elected Officials kasubong sang Job Orders kag Contract of Service Workers.
Kasubong sa pahayag sang gobernador, ginpahayag ni Garin nga regular nga nagapatigayon sang imbestigasyon ang Commission on Audit apang gin-ako sang opisyal nga ginkakibot niya ang tuhoy sa ghost employees.
May kaangtanan sa nasambit nga kontrobersiya, ginpahayag sang Bise Gobernador nga mas makapaayo nga hulaton na lang ang resulta sang imbestigasyon sang Commission on Audit antes siya magbuya sang pahayag.
