ILOILO CITY – Indi magtambong si Iloilo City Vice Mayor Jeffrey Ganzon sa special session sang Sanguniang Panlunsod buwas nga adlaw, Abril 26.
Ini ang may kaangtanan sa tuyo nga pagdeklarar nga ipaidalom sa State of Calamity ang syudad sang Iloilo bangud sa kakulang sang tubig.
Sa interview sang Bombo Radyo kay Ganzon, iya ginpahayag nga wala ang iya presensya sa pagsinapol nga patigayunon buwas, alas 2:00 sang hapon bangud nga naka on-leave siya tubtub sa Abril 30.
Tuhoy naman sa indi niya pagtambong sa regular session, ginpahayag ni Ganzon nga wala siya nakatambong bangud sa ‘personal commitments’.
Bag-o pa man ang ginpatigayon nga session, ginpahayag ni Ganzon nga nakalisensya na siya sa iya mga kaupod nga indi makatambong sa pagsinapol rason nga iya gin-appoint si Iloilo City Councilor Candice Tupas nga amo ang mangin presiding officer.
Sa iya personal nga bahin, ginpahayag sang bise alkalde nga indi siya pabor nga gamiton ang bug-os nga calamity fund bangud nga bastante man ang trust fund nga mahimo gastuhon sa water distribution.
Magluwas diri, madamu man sang nakita nga ‘inconsistencies’ si Ganzon tuhoy sa tuyo nga pagdeklarar sang State of Calamity.
Una na nga ginpahayag ni Iloilo City Councilor Love-Love Baronda nga wala siya nagtambong sa session bangud nga pat-od nga padag-an lang sila sang numero sang iban nga konsehal kag indi siya pabor nga ipaidalom sa State of Calamity ang syudad.
Ini bangud nga suno sa iya, wala nalab-ot sang syudad sang Iloilo ang criteria sa pagdeklarar sang State of Calamity.
Samtang, nagsakit naman ang tiyan ni Liga ng mga Barangay President Irene Ong rason nga wala siya nagtambong sa session kag kasubong ni Baronda, indi man siya pabor nga ipaidalom sa State of Calamity ang syudad.
