GUIMARAS – Nagapanalakit ang tuhod kag nagakagutman ang mga pasahero sa Jordan, Guimaras bangud sa tuman ka dugay nga paghulat sang byahe sang fiber glass boats nga amo ang mahimo sakyan patabok sa syudad sang Iloilo.
Ini bangud wala na ginapahanugutan ang wooden-hulled ukon traditional pumpboats nga makabyahe sa kalalawran.
Duha kuntani ka fiber glass boats ang nagabyahe sa Jordan Wharf padulong sa Parola Wharf and vice versa apang kahapon, naguba ang isa gani nga gina-amat amat lang sang isa ka fiber glass vessel ang pag-transport sa ginatos ka mga pasahero.
Sa interview sang Bombo Radyo kay Derbi Galuno, isa sa mga pasahero, iya ginpahayag nga nagalab-ot sa anum ka oras ukon masobra pa ang hulat sang mga pasahero sa pantalan.
Wala man sila sang mahimo suno sa iya kundi magsunod sa pagsulundad sang otoridad.
Nahibaluan nga modernized vessels lang ang ginapahanugutan nga magbyahe sa kalalawran sang Guimaras matapos nga wala na naghatag sang extension ang Maritime Industry Authority Central Office sa byahe sang wooden hulled motorbanca kasunod sang pag-expire sang ila Certificate of Public Convenience sang Disyembre 31,2020.
