Ginpahayag sang Department of Foreign Affairs (DFA) nga may pila ka Pilipino nga seafarers ang kabahin sang mga naluwas halin sa naglugdang nga cargo vessel Eternity C sa Red Sea matapos ini atakehon sang Houthi rebels halin sa Yemen.
Suno kay DFA Undersecretary Eduardo De Vega, nakita sa ginpagwa nga video sang mga rebelde ang pila ka Pilipino nga sakop sang crew sang barko, apang wala pa makumpirmar ang ila eksakto nga kadamuon kag identity.
Nagpangayo na sang bulig ang DFA sa Department of Migrant Workers (DMW) para makakuha sang dugang nga impormasyon.
Sa ginpagwa nga video sang Houthi group, ila ginpahayag nga 11 ka crew members ang ila naluwas, duha ang pilason kag isa ang napatay. Sa kabug-usan nga 25 ka tripulante sang Eternity C, 15 ang padayon nga ginapangita, base sa report sang EU naval force.
Nagapadayon subong ang mga atake sang Houthi rebels sa mga barko nga ila ginapatihan may koneksyon sa Israel.
