ILOILO CITY–Indi tanan ang nahatagan sang taripa sang bag-o nga pletehan nga ginapatuman sumugud subung nga adlaw sa syudad kag probinsya sang Iloilo.
Sa interview sang Bombo Radyo, ginpahayag ni Reymundo “Boyet” Parcon, presidente sang Iloilo City Loop Alliance of Jeepney Operators and Owners Association (ICLAJODA) nga wala pa maubos survey sang Land Transportation Franchising and Regulatory Board (LTFRB) ang ruta sang mga Public Utility Jeepney (PUJ).
Malahalon sunu kay Parcon ang survey nga ginapatigayon sang LTFRB bangud diri ginatumod ang landmarks kag ginatakos ang distansya agud mahibalu-an kun pila ang e-plete sang mga pasahero.
Tungud diri sunu kay Parcon, nagagilinutok ang mga tawo sa nasambit nga talatapan agud magkuha sang taripa apang indi man gihapon sila mahatagan.
Nahibalu-an nga kun wala sang taripa ang mga nagabyahe nga PUJ, indi man sila mahimo nga makapanukot sang bag-o nga pletehan.
Ang madakpan nga wala sang taripa apang nagapanukot sang bag-o nga pletehan ang mahimo nga magmulta sang 5,000 pesos , dugang nga 5,000 pesos para sa overcharging kag kanselasyon sang iya prangkisa.
Nahibalu-an nga P8.50 ang regular nga pamasahe samtang P7.00 naman ang discounted nga plete para sa mga estudyante, senior citizen kag Persons With Dissabilities (PWD).