Ginagamit sang China ang pila ka mga Pilipino nga pulitiko diri sa Pilipinas agud nga mapaluya ang posisyon sang pungsod sa West Philippine Sea.
Ini ang ginpahayag ni Dr. Jeffrey Ordaniel, ang President kag Chief Executive Officer sang non-government, nonprofit, kag nonpartisan volunteer-based organization nga WPS Inc. ukon We Protect our Seas Inc.
Suno kay Ordaniel, kabahin ini sang Chinese malign influence and foreign interference diri sa Pilipinas.
Wala sang ginhambal nga pangalan si Ordaniel kun sin-o nga pulitiko ang iya ginatumod, apang gin-halimbawa sini ang ginhambal sang senador nga wala sang coordinates ang Philippine exclusive economic zone sa West Philippine Sea.
Matandaan nga subong nga semana sang nangin mainit ang debate nanday Senador Rodante Marcoleta kag Senador Francis Pangilinan kaangot sa takos, kalaparon, kag grid coordinates sang West Philippine Sea.
Natabo ang komento ni Marcoleta sa Senate plenary session sang ginadiskusyunan ang Senate Resolution 256 nga nagatukso sa Chinese officials sa ila nga mga pahayag batok sa Philippine officials.
Matandaan nga sang 2024 pa lang, ginkumpirma na sang National Intelligence Coordinating Agency (NICA) nga may yara sang Chinese malign influence and foreign interference (MIFI) activities diri sa Pilipinas kag wala sang rehiyon nga exempted sa ila nga impluwensya. Ginapahayag nga ini nga interference ang naga-target sang democratic processes, legislative bodies, kag local governance agud nga maduso ang interes sang China sa teritoryo kag seguridad.#
