Nagpabutyag sang kahangawa ang pila ka mga residente sang Barangay Sambag, Jaro, Iloilo City nga may natabo nga pagbukas sang manhole sa ila lugar kaangay sang natabo sa Guanco St. Iloilo City Proper.
Suno sa mga residente, ang amo nga insidente natabo antes pa sang ginreport nga pagbukas man sa Guanco nga malapit sa pawnshop kag remittance.
Suno pa sa nakasaksi takna pasado ala-una sang kaagahon ginbuksan sang mga suspek ang manhole nga ginapatihan ginapanag-iyahan sang isa ka telecommunications company.
Sa interview sang Bombo Radyo kay Alyas Jerome, nga nakasaksi sang insidente, iya ginpahayag nga natingala siya sang makita niya ang pila ka mga indibidwal nga gin-amat-amat tiltig ang manhole.
Sang nagpalapit siya, nag-amat-amat man nga nagpalagyo ang mga indibidwal.
Suno pa kay alyas Jerome, kaangay sang sa Guanco ang modus sang mga indibidwal.
May ara sila sang van nga ginasakyan kun sa diin ginalakipan sang lima ka indibidwal nga nagapalibot sa manhole, duha sa sulod sang van kag isa sa guwa sini.
Suno pa kay alyas Jerome, ang ila bayo may reflectorized vest kag hard hat nga kaangay sang mga construction worker nga nag-operate sa gab-i.
Ginapatihan sang mga residente nga illegal ang ginahimo sang mga indibidwal bangud takna tunga sang gab-i ang mga ini naga-operate.
Nagapati man sila nga posible nga pagkuha sang mga wire ang tuyo sang mga suspek, bangud mas mahapos ini himuon paagi sa manhole.
