Ginaduso ni Sangguniang Bayan Member Vincent De Asis ang pag-implementar sang ordinansa nga nagahatag ang Local Government Unit (LGU) sang Buenavista, Guimaras sang cash incentives sa mga senior citizens nga naga-edad sang 80, 85, 90 pataas.
Sa interview sang Bombo Radyo kay SB member De Asis, iya ginpahayag nga ginpatigayon nga session subong nga adlaw, gintestingan niya nga ipasar ang resolusyon bangud man sa urgency kag naligadan na sang duha ka tuig.
Suno kay De Asis, wala niya mahibaluan ang rason kon ngaa wala gina-implementar sang local nga panguluhan ang makabulig kontani sa mga katigulangan sang banwa.
Ginbuyagyag man sang natungdan nga ginbalabagan sang pila ka mga sangguniang bayan members ang amo nga tikang rason man nga mas desidido ini nga ipasar.
Nahibaluan nga 2022 sang nagsugod untat ang cash incentives nga ginahatag sa mga senior citizens sa banwa sang Buenavista, Guimaras.
