ILOILO CITY – Gin abi-abi sang pila ka mga senador ang plano nga pagtuon liwat sang K to 12 curriculum.
Suno kay outgoing Senate President Vicente Sotto III, ang pag-review sang K+12 ang isa ka maayo nga plano bangud nga lain nga administrasyon ang nag-propose sini.
Dugang pa niya, kinahanglan sang masunod nga pinuno sang Department of Education (DepEd) nga i-assess kun bala ang ini nga curriculum ang ibalik sa apat ka tuig nga secondary education.
Suno naman kay Senator Nancy Binay, ini na ang tion nga magpatigayon sang review sang K to 12 curriculum apang indi pag-untaton kundi pangita-an sang pamaagi nga panamion ini.
Pahayag niya, kinahanglan nga mangin 12 ka tuig ang pag-eskwela sang mga kabataan bangud disbentaha sa mga Pilipino nga nagatrabaho sa gwa sang pungsod bangud sang kakulang sang numero sang tuig sa eskwelahan.
Suno naman kay Senator-elect Francis Escudero, ang layi nga nagapatuman sang K to 12 program ang may yara sang provision nga nagamandu sang review sang curriculum.
Kung madumduman, sang Lunes, ginpahayag ni outgoing Senate Minority Leader Franklin Drilon nga magapangatubang sang mabudlay nga problema si Vice President-elect Sara Duterte bilang masunod nga DepEd chief bangud nga 90% sang Pilipino nga mga estudyante nga naga-edad 10 ka tuig ang indi makahibalo nga magbasa.
Sang amo man nga adlaw, ginpahayag ni Duterte nga may yara na sang mandu si President-elect Ferdinand Marcos Jr. nga tun-an liwat ang pagpatuman sang K to 12 curriculum.
Ang K to 12 curriculum ang ginduso sa idalom sang administrasyon ni the late former President Benigno “Noynoy” Aquino III nga kabahin sang iya nga 10-point proposal sa pagkay-o sang basic education system sang pungsod.
Sa amo nga curriculum, ang mga estudyante ang dapat nga magtuon sang isa ka tuig sa kindergarten, anum sa elementarya, apat sa junior high school kag duha ka tuig sa senior high school.
