ILOILO CITY- Maga-file sang joint resolution ang pila ka mga senador agud i-revoke ang executive order ni Presidente Rodrigo Duterte sa diin ginpanubo ang taripa sa pork imports.
Sa interview sang Bombo Radyo kay Senator Francis Pangilinan, isa sa mga senador nga maga-file sang joint resolution upod sanday Senate Minority Leader Franklin Drilon kag Senator Cynthia Villar, iya ginpahayag nga ang EO 128 sang presidente ang magapatay sa local hog industry sa baylo nga African Swine Fever ukon ASF.
Suno kay Pangilinan, nagaantos na ang mga local hog raisers kag indi masarangan sang mga ini nga makompetensya sa dalagko nga importers sang meat products gani katungdanan sang kongreso nga buligan sila.
Pahayag sang senador, ang hinali nga pagnubo sang taripa sa pork products ang mahimo magresulta sa bilyones pesos nga kapierdehan sa revenue sang gobyerno.
Matandaan nga gin-isyu sang presidente ang executive order bilang sabat sa rekomendasyon sang Department of Agriculture.
Apang suno sa natungdan, ang nangin tikang sang ahensya ang isa ka pagbalewala sa palangabuhian sang linibo nga local hog raisers.
Ginhangkat man sang senador ang pagpasa sang presidente sa kongreso sang plano nga pataasan ang minimum access volume (MAV) sang 350,000 metric tons (MT) gikan sa nagaeksister nga 54,000 MT.
Nahibaluan nga sa idalom sa EO 128, ang tariff rate para sa imported pork meat nga nasulod sa quota ukon minimum access volume (MAV) ang yara sa 5% sa una nga tatlo ka bulan sa pagsugod sang pagpatuman sang EO kag 10% para sa ikaapat tubtob 12 ka bulan.
Ang tariff rate naman para sa imported meat nga wala nakasulod sa MAV, ang gintalana sa 15% para sa una nga tatlo ka bulan kag 20% para sa ikaapat tubtob sa ika-12 nga bulan.
Ang existing 30% tubtob 40% nga tariff rate para sa imported pork ang ibalik pagkatapos sang 12 ka bulan.
