Ginahulat nalang nga mapasar sa Senado ang House Bill No. 8477 ukon “An Act Reapportioning the Lone Legislative District of the City of Iloilo”.
Sa idalom sang hagna, nasaad nga ang 1st congressional district ang lakipan sang distrito sang Jaro, La Paz kag Mandurriao samtang ang 2nd congressional district naman ang bug-usan sang City Proper, Lapuz, Arevalo kag Molo.
Sa exclusive interview sang Bombo Radyo kay Iloilo City Lone District Rep. Julienne ‘Jamjam’ Baronda, iya ginpahayag nga matapos maaprubahan sa third and final reading ang iya ginduso nga hagna nga amo ang substitute bill sang House Bill 3074, ginahulat nalang nga mabotohan kag mapasar ini sa Senado.
Nagalaom ang mamalidha nga maforward ang hagna sa Committee on Local Government sa Senado.
Gintuad man ni Baronda nga nagpabutyag na sang suporta sa hagna ang pila ka mga senador kaangay nanday Imee Marcos, Juan Miguel Zubiri kag Panfilo ‘Ping’ Lacson.
Nahibaluan nga ang co-authors ni Baronda sa House Bill 8477 amo sanday Iloilo 5th District Rep. Raul Tupas, Iloilo 2nd District Rep. Michael Gorriceta kag Abang Lingkod Party-list Rep. Joseph Stephen Paduano.
Sa tion nga mangin layi ang hagna, nagakahulugan nga duha na ang mangin Representative sang Iloilo City sa Kamara.
May yara man sang reapportioning sa Sangguniang Panlungsod sa diin mangin 16 na ang Councilors.
Diri kag tungaon sa walo ang mga konsehal sa kada distrito, samtang isa gihapon ang Mayor.
Magluwas sa House Bill 8477, ginpahayag ni Baronda nga ginaduso man sa Kamara nga maaprubahan ang pagpatukod sang Iloilo City Uswag Hospital Kag Land Transportation Office (LTO) Extension Office.
Nahibaluan nga indi ini ang pinakauna nga kahigayunan nga tungaon ang syudad sang Iloilo sa duha ka distrito.
Ini ang una nga ginduso ni former Iloilo City Lone District Rep. Raul Gonzalez Jr. kag mangin si anay Representative kag subong incumbent Mayor Jerry Treñas ang nagfile man sang kaangay nga hagna sa iya siyam ka tuig nga termino bilang tiglawas sang Lone district sang Iloilo City.
Ang tuyo nga pagtunga sang Iloilo City sa duha ka district ang napaslawan matapos wala nalab-ot ang minimum population nga 500,000.
Apang suno kay Baronda, sa subong naglab-ot na ang populasyon sang Iloilo City sa masobra tunga sa milyon.
