Nagapakita sang suporta ang pila ka mga senador nga suguran ang impeachment trial batok kay VP Sara Duterte sa Agosto 4, isa ka semana matapos ang State of the Nation Address (SONA) ni President Ferdinand Marcos Jr.
Suno kay Senador Joel Villanueva, may yara na sang informal nga mga paghisugot ang pila ka senador upod kay Senate President Francis “Chiz” Escudero parte sa posibilidad nga mag-convene ang Senado bilang impeachment court sa nasambit nga petsa.
Ginpahayag ni Villanueva nga kabahin ini sang preparasyon sang Senado kag Kamara para sa 20th Congress, lakip na ang pagpili sang mga lider kag mga committee chairmanships.
Ginpahayag man niya nga kumbinsido siya nga mas maayo nga hatagan anay sang husto nga oras ang mga lawmakers antes magsugod ang trial.
Apang ginklaro niya nga wala pa sang pinal nga desisyon, apisar pa man may apat tubtob anom na ka senador nga nagapakita sang pagsugot nga sa Agosto 4 magatipon ang Senado bilang impeachment court.
Madumduman nga una na nga ginpresentar ni Senate President Escudero ang isa ka proposed calendar para sa impeachment proceedings.
Suno sa kalendaryo, maga-panumpa ang mga bag-o nga senator-judges sa Hulyo 29, kag ang opisyal nga pagsugod sang impeachment trial amo ang Hulyo 30.
