𝗗𝗨𝗠𝗔𝗡𝗚𝗔𝗦, 𝗜𝗟𝗢𝗜𝗟𝗢 — Nagakabalaka ang mga talipapa vendors sang Brgy. PD Monfort, Dumangas, Iloilo bangud sa delay nga business permit nga ginakuha sa banwa sang Dumangas.
Sa interview sang Bombo Radyo kay Alyas Baby, talipapa vendor, iya ginpahayag nga nakaistoryahanay sila ni alyas Maila nga amo ang naga-asikaso sang permit, sa diin, ginpamangkot niya kun ngaa na-delay ang ila nga permit.
Suno kay Alyas Baby kag santo sa sabat ni Maila, ginaproseso pa ang mga kinahanglanon agud nga matigayon nga mahatag ang permit sa ila.
Ginpahayag man sini nga sa pito ka tuig niya nga nagabaligya sa talipapa, ini ang labing-una nga tion nga na-delay ang pagkuha niya sang permit.
Dugang pa sang natungdan nga napasa naman nila ang tanan nga mga dokumento nga kinahanglanon sa paggawad sang permit.
Nahibaluan nga ang 4.6 hectares nga duta nga ginapahamtangan sang ila nga negosyo ang ginaalegar nga bawion sang ginapahayag nga nagapanag-iya sini.
Nagpasalig naman ang punong barangay nga mahatag ang permit sa mga talipapa vendors, apang hulat-hulaton lang anay.
Suno kay Punong Barangay Eliseo Rodriguez sang Brgy. PD Monfort, Dumangas, nagahalong lang ini sa iya nga tikang nga ginahimo bangud nagapabilin nga yara sa korte ang status sang duta.
Ginpahayag man sini nga ginatun-an niya ang mga masunod nga himuon samtang nagahulat sang resulta sang dalagan sang kaso.
Nagpasalig man ini nga indi niya pagbutang sa alang-alang ang mga vendors bangud ginahimo sini ang iya ikasarang agud nga maresolba ang problema.
Nahibaluan nga 1998 sang ginbawi sang amo nga tag-iya ang duta, apang wala natigayon bangud sa kakulangan sang proweba kag dokumento.
Apang sang nag-auction agud mabawi, ang ginapahayag nga tag-iya, amo ang naguwa nga highest bidder, nga amo sa subong ang ginahulat nga resulta.
