ILOILO CITY – Posible nga indi pa makabyahe ang pila ka mga unit sang mga pampubliko nga jeep sa syudad sang Iloilo sa Lunes, Mayo 18.
Sa interview sang Bombo Radyo kay Raymundo ‘Boyet’ Parcon, Presidente sang Iloilo City Loop Alliance of Jeepney Operators and Driver’s Association, iya ginpahayag nga posible gamay lang ang magabyahe bangud nga atrasado ang paghatag sang requirements nga ginpasa sa Land Transportation Franchising and Regulatory Board.
Suno kay Parcon, madamo pa sang permit nga wala naaprubahan sang nasambit nga ahensya bangud sa tuman ka damo nga aplikante.
May kaangtanan naman sa pagdugang sang pamasahe, ginpahayag sang natungdan nga gin-aprubahan na sang Land Transportation Franchising and Regulatory Board kag Department of Transportation ang P1.50 nga dugang kun sa diin mangin P9 na ang regular fare.
