ILOILO CITY – Indi na makahulat ang pila ka mga vendors sa merkado sa syudad sang Iloilo nga mapaidalum sa total rehabilitation.
Sa interview sang Bombo Radyo kay Junric Robles, presidente sang Arevalo Public Market, iya ginpahayag nga mas luyag niya nga makay-o na sa labing madali nga panahon ang mga merkado sa syudad ilabi na ang iya sang Arevalo.
Suno kay Robles, nagatulo bangud gabok na ang atop sang ila nga merkado sa diin nagahatag ini sang dako nga huol indi lamang sa mga manugbaligya kundi amo man sa mga bumalakal.
Apang pahayag ni Robles dako nga palamangkutanon lamang para sa ila kun diin sila ihamtang nga lugar sa tion nga patigayunon ang total rehabilitation sang ila merkado.
Nagpangabay man ang natungdan sa Iloilo City Government nga kuntani unahon sa nasambit nga rehabilitation ang small markets sa diin nalakip ang Arevalo Market.
Matandaan nga nalakip sa mga public market nga ginatarget subong nga ipakay-o sang gobyerno amo ang Arevalo Market, Mandurriao Market, Jaro Big Market kag La Paz Market.
Samtang yara naman sa alignment sang Private Public Partnership (PPP) ang Iloilo Terminal Market kag Central Market sa diin sa proseso na ini sang pagpakay-o sa subong.
Nahibaluan nga may P11 million nga pondo ang Iloilo City Government para sa mga nasambit nga merkado nga i-rehabilitate subong nga tuig 2021.
