ILOILO CITY – Nagapati ang mga kaangay nga kandidata ni Teresita Ssen “Wynwyn” Marquez nga dako nga pagpanghangkat para sa aktres nga makuha ang korona sa Miss World Philippines 2017.
Sa interview sang Bombo Radyo Iloilo kay Jeanyfer Ozbot, ginpahayag sini nga sa screening pa lang, tuman ang nabatyagan sini nga nerbyos kag pressure bangud may mga modelo, beterana na sa pageant kag celebrity kaangay sang 25-anyos nga aktres.
Apang kun ginakulbaan siya, ginpahayag sang 21-year old nga reigning Miss Western Visayas nga sigurado siya nga doble ang nabatyagan nga kakulba ni Marquez bangud ginabantayan ini kag ginalauman nga makuha ang titulo.
Sa pihak sini, nagapati si Ozbot nga mangin patas ang mga judges kag indi magtan-aw sa background sang mga kandidata.
Magluwas sa Miss World Philippines crown, agawan man sang 35 ka mga kandidata ang mga titulo sa Miss Eco International Philippines, Miss Multinational Philippines kag Miss Reina Hispano-Americana Filipinas.
Hiwaton ang coronation night sang Miss World Philippines 2017 sa Setyembre 3, sa Mall of Asia Arena kun sa diin ipasa sang Bicolana model nga si Catriona Gray ang iya korona.