Ginpaidalom na sa code white ang tanan nga mga ospital sa idalom sang Manila Local Government Unit kahapon nga adlaw, Agosto 29.
Ini ang ginpakigbahin ni Manila Officer in Charge-City Health Officer Dr. Grace Padilla kay Manila Mayor Isko Moreno.
May kaangtanan ini sa nagapadayun nga pag-ulan nga dala sang habagat ukon southwest monsoon nga nagatuga sang pagbaha, landslide, kag pagkaguba sang pila ka mga establisyamento.
Sa idalom sang code white alert, kinahanglan ang 24/7 ukon 24 oras nga nakaalerto ang medical personnel, emergency response teams, kag ang mga operation centers sa nasambit nga lugar.
Kabahin sa mga ginpaidalom sa code white amo ang Gat Andres Bonifacio Medical Center, Ospital ng Tondo, Justice Jose Abad Santos General Hospital, Mayor Ramon Bagatsing General Hospital, Ospital ng Maynila Medical Center, kag Sta. Ana Hospital.
Sa subong, nagapabilin man nga nakaalerto ang evacuation centers, district welfare offices, kag health centers sa bug-os nga Manila, sa idalom sang direktiba ni Manila Mayor Moreno.
