ILOILO CITY – Lauman ang pila ka pagbag-o sa quarantine restrictions sa syudad sang Iloilo kadungan sang pagpatuman sang Modified General Community Quarantine umpisa subong nga adlaw, Setyembre 1.
Sa interview sang Bombo Radyo kay Iloilo City Mayor Jerry Treñas, iya ginpahayag nga may yara na siya sang draft sang Executive Order kun ano ang mga pagbag-o sa quarantine restrictions.
Suno kay Treñas, lakip sa pagabag-uhon amo ang oras sang curfew, pagpahanugot sa mass gatherings, pagdugang sang dine-in capacity sa mga kalan-an, pagbukas sang mga negosyo nga ginpasirado sang General Community Quarantine kag ang pagdula sang liquor ban.
Apisar sini, ginpahayag sang alkalde nga istrikto sa gihapon nga ipatuman ang minimum health protocol sa pampubliko nga lugar.
May kaangtanan naman sa ginakulang nga hospital beds sa syudad sang Iloilo, ginpahayag ni Treñas nga rule of thumb ang dapat nga sundon.
Sa pagpaathag sang alkalde, kinahanglan nga may yara sang triage sa pag-admit sa mga pasyente kun sa diin sa quarantine facility lamang ang mga asymptomatic nga COVID-19 patients.
Magluwas diri, mas makapaayo man nga pasangkaron ang bed capacity sang tagsa ka hospital agud nga mas madamo nga pasyente ang mahimo nga ma-admit.
