ILOILO CITY – Nagbilin sang kahalitan ang paglaslas sang buhawi kag pag-ulan sang hail ukon ice sa Barangay Lanag, Sta. Barbara, Iloilo kahapon sang hapon.
Naguba ang puluy-an ni Abonjo Soliva samtang partially damaged naman ang puluy-an ni Loreta Catalan, iloy sang mixed martial arts world champion nga si Rene Catalan.
Nagkalatumba ang madamo nga puno sang kahoy sa tuman kabaskug nga hangin kag diutayan nga matumbahan ang salakyan ni STa. Barbara Mayor Dennis Superficial nga nagabiyahe sang maglaslas ang buhawi.
Sa interview sang Bombo Radyo Iloilo, ginpahayag ni Abelardo Castillano, residente sang nasambit nga lugar, una nga kahigayunan ini nga naka-eksperyensiya siya sa pag-ulan sang ice.
Daw kaangay suno kay Castillano nga ginabato ang atup sang ila balay.
Sa pihak sang indi maayo nga tiyempo, ginkalipay naman ni Phoebe Castillano nga naka-experience ini sang pag-ulan sang ice.
Paathag naman ni Michael Viola, meteorologist sang Pagasa-Iloilo, naglab-ot sa freezing level ang mga cloud rains nga rason sang pabubo sang hail ukon ice.