ILOILO CITY – Nagapati ang mga pumuluyo sang Guam nga nahadlok ang North Korea sa pamahog ni US President Donald Trump, rason sang pagkambyo sang Pyongyang sa pamahog nga atakehon ang Guam nga isa ka US territory.
Sa interview sang Bombo Radyo Iloilo, ginpahayag ni Fred Tagamolila, isa ka retired engineer nga tumandok sang Passi City, Iloilo apang sa karon nagapuyo na sa Guam, nga nagapati sila nga epektibo ang pamahog ni Trump rason nga nagdesisyon si North Korean leader Kim Jong Un nga indi na pagpadayunon ang paglunsyar sang missile.
Magluwas diri suno kay Tagamolila, yara man ang Japan kag South Korea nga nagpahayag man sang kahandaan nga tapnaon ang anuman nga missile nga maghalin sa North Korea.
Kahapon gintawgan mismo ni Trump si Guam Governor Eddie Calvo agud masiguro nga protektahan ang pungsod batok sa North Korea.
Sa pagkamatuod suno kay Tagamolila, ginhimo nga kaladlawan sang mga residente sang Guam ang tuhoy sa pamahog nga missile strike sang Pyongyang bangud sa klase sang teknolohiya sang North Korea, posible nga indi pa sini maigo ang Guam.
Apisar gin-ako sini nga nagpreparar man ang gobyerno sang Guam kun sa diin nagpaguwa pa ini sang fact sheet kun paano makaluwas sa radiation nga wala man ginsapak sang mga residente bangud kampante ang mga ini.
Ang mga balay sa Guamn suno sa retirado nga engineer ang gindesinyo nga mapag-on sa anuman nga bagyo, linog kag bisan pa sa radiation.