Naghuyhuy ang abaga sang pila ka mga indibidwal nga aga pa nagpila sa University of the Philippines Visayas (UPV) — isa sa satellite registration site sang Iloilo City Comelec Office, matapos wala mahibalo nga tubtob lang sa 1,000 ka indibidwal ang ma-akomodar para sa voter registration.
Sa interview sang Bombo Radyo kay Krissle Primero, estudyante kag residente sang Oton, Iloilo, iya ginpahayag nga las 6:00 pa lang sang aga tuman na ka lawig ang pila sa nasambit nga registration site.
Suno kay Primero, wala gid sila sang ihibalo nga ginalimitahan lang sa 1,000 ka indibidwal ang ma-akomodar para sa pagparehistro.
Bangud sini suno sa natungdan, madamo sa ila ang ginpakamaayo na lang nga magpauli apisar dismayado.
Dugang pa niya, mahingagaw na lang sila sa pagparehistro sa Lunes, Septyembre 20 sa University of Iloilo — isa pa ka satellite registration site sang Iloilo City Comelec Office agud nga makaparehistro para sa 2022 elections.
Samtang, istrikto naman nga ginapatuman sang mga gin-deploy nga personnel sang Iloilo City Police Office (ICPO) ang minimum public health standards sa University of the Philippines Visayas (UPV) — isa sa satellite registration site sang loilo City Comelec Office.
Sa interview sang Bombo Radyo kay Police Captain Shella Mae Sangrines, Spokesperson sang ICPO kag hepe sang Police Station 1, iya ginpahayag nga ginlauman na nila nga maglawig ang pila sa nasambit nga registration site bangud madamo pa ang wala nakaparehistro para sa 2022 national elections.
Suno kay Sangrines, 700 lang kuntani ang i-akomodar subong nga adlaw sa UPV apang bangud malapad man ang espasyo sa sulod sang buluthuan kag tuman ka damo sang tawo, gin-akomodar na lang ang dugang nga 300 pa ka indibidwal.
Pahayag sang natungdan, gin-abisuhan na lang man nila nga magpauli ang iban nga nagalaom pa nga ma-akomodar bangud halos masobra 1,000 na ang ginpasugtan nga makaparehistro.
Sa pihak sini, maayo lang suno sa pulis nga nagasunod man ang mga tawo kun pangsawayon ilabi na sa pagtuman sa mga hugot nga pagsulundan.
