Ginpangkakas ang pila ka senior citizens sa Brgy. Rizal Pala-Pala Uno, Iloilo City Proper bilang benepisyaryo sang cash for senior citizens bangud sa ginapahayag sa ila pagsuporta sa ‘political rivals’.
Sa interview sang Bombo Radyo kay Perlita Detablan, Senior Citizen President sang nasambit nga barangay, iya ginpahayag nga sa ila bahin, wala pa sang may nakala-ot nga reklamo nahanungod sa pagpangkakas sang ila katapo bangud sa ginapahayag pagpakita sang suporta sa team USWAG ni Iloilo City Mayor Jerry Treñas.
Suno kay Detablan, gilayon man nga ginapahibalo sa iya kon may mga senior citizens nga ginapangkakas ukon ginadugang sa amo nga cash for senior citizens.
Gintumod man sini nga santo sa iya nabatian nga mga reports, kalabanan sa reklamo amo ang ginapahayag nagapadulong sa ila punong barangay nga magpalista, apang kon indi kaalyado sang punong barangay, wala sini ginadala bilang benipesyaryo.
Gin-athag man sang natungdan nga wala sang pagpanagtaganay sang cash assistance subong nga adlaw, baliskad man sa nagalapta nga impormasyon sa ila mga katapo.
Nahibaluan nga ang cash assistance ang kabahin sang Expanded Centenarians Act of 2024 kun sa diin ang octogenarians ukon 80 tubtob 85-anyos kag nonagenarians ukon 90 tubtob 95-anyos ang nagabaton sang P10,000, samtang ang mga centenarians ukon 100-anyos ang nagabaton sang P100,000.
Una na nga nagpabutyag sang pagkabalaka ang Iloilo City government sa isa ka palaabuton nga cash payout event sa Pebrero 28, nga ginreport nga gin-organisar ni Iloilo City lone District Rep. Julienne “Jam-Jam” Baronda nga wala sang nagakaigo nga koordinasyon sa opisina ni Mayor Treñas.
Nabaton na man sang National Commission of Senior Citizens ang sulat nga ginpadala sang Iloilo City government sa amo nga talatapan naangot sa ginaalegar pagpangkakas sang mga senior citizen bilang benepisyaryo.
Suno kay Ms. Joy Fantilaga, spokesperson ni Iloilo City Mayor Jerry Treñas, iya ginapahayag nga indi ini ang una nga kahigayunan nga natabo bangud makapila na man ka beses nga nabatian sang talatapan ang amo nga reklamo.
Dugang ni Fantilaga, ang Brgy. Rizal Pala-Pala Uno lang gid ang nangisog nga magpalab-ot sang ila concern sa city government.
Gin-athag man sini nga indi luyag sang alkalde nga magamit sa pamulitika ang cash gift sang senior citizens.
Ginbuyagyag man sang natungdan nga ang grant sa cash for senior citizens ang naghalin sa pagpanguna ni Iloilo City lone District Rep. Julienne “Jam-Jam” Baronda.
Gintumod man ni Fantilaga nga santo sa guidelines, dapat nagakoordinar kontani sila sa Local Government Unit ukon LGU apang ang nagakatabo, nagaderetso sila sa mga kabarangayan.
