ILOILO CITY – May nga talatapan sa Iloilo City Hall nga nagpahayag nga nagakinahanglan man sang salakyan ukon dugang nga salakyan agud matungdan sang madasig ang tagsa ka trabaho sa syudad.
Base sa mga natipon nga impormasyon sang Bombo Radyo Iloilo, ini nga mga opisina amo ang:
* City Environment and Natural Resources Office (CENRO);
* City Social Welfare and Development Office (CSWDO);* General Services Office (GSO);
* Task Force on Morals and Values Formation;
* City Agriculture Office; kag,
* Anti-Squatting and Illegal Structures Unit (ASISU)
Sa bahin sang CSWDO, isa lang ka salakyan nga ginagamit sang personnel sa pagdala sang food and non-food items kun may matabo nga kalamidad ukon sunog sa syudad kag amo man sa nanuhay-tuhay nga serbisyo sa mga komunidad.
Sa CENRO, ginpahayag ni Engr. Noel Hechanova nga duha ang ila salakyan [under repair pa ang isa] kag kinahanglan nila ang dugang nga tricyles para sa mga proyekto sa esplanades kag plaza.
300 ang mga personnel sang CENRO gani ginabulos-bulusan lang kag ginaschedule ang paggamit sang ila L300 existing service vehicle.
Sa ASISU, apat ka salakyan nga ginagamit apang isa diri ang ginpahulam lang sang City Treasurer’s Office.
Sa interview sang Bombo Radyo kay ASISU head Mr. Love Joy Hosenilla, iya ginpahayag nga kinahanglan kuntani ang dump truck agud nga maubos man karga ang obstructions nga amo man ang ginakakas sang ila nga mga personnel sa ila adlaw-adlaw nga trabaho.
“Bisan isa lang [ka dump truck], pero kun ma-provide sila duha, mas mayo gani para sa kada team may ara kami nga truck,” pahayag ni Hosenilla.
Sa bahin sang Task Force on Morals and Values Formation, wala sang kaugalingon nga salakyan nga ginagamit ang mga personnel rason nga nagatakbil lang sila sa patrol vehicle sang Iloilo City Police Office.
Ini nga talatapan amo ang nagamonitor sa mga menor de edad kag commercial sex workers ilabi na kun gab-i, naga-check sa mga establisemento komersyal, kag nagapatigayon sang iban pa nga saturation drive.
Sa bahin sang City Agriculture Office, ginpahayag ni Mr. Iñigo Garingalao nga duha lang ang salakyan nga ginagamit sa pagtransport sang mga seedlings. “Kinahanglan pa namon ang dugang nga mobility,” pahayag ni Garingalao.
Kun may mini truck suno sa iya ukon apat ka motorsiklo, mas maayo gid agud maagyan pati ang magagmay nga mga dalanon nga indi maagyan sang four-wheeled vehicles. Kinahanglan ini suno sa sa pagkuha sang mga fingerlings, abuno, palay, kag iban pa halin sa crop and fishery sections nga para tanan sa development sang agrikultura sang syudad.
Sa GSO, ginpahayag man ni Mr. Joren Sartorio ngan kinahanglan man kuntani nila ang government-issued vehicle para sa supply and procurement division, inventory team, solid waste monitoring, street maintenance team, kag iban pa.
SIN-O ANG MAS NAGAKINANGLAN?
Umpisa sang nagligad nga semana, kontrobersyal na ang 13 ka units sang 4×2 Mitsubishi Strada nga gin-procure sang syudad nga ginpangtugyan sa mga opisina sang mga konsehal kag isa para sa SK Federation.
Ginkwestyon sang publiko kun ano ka-importante subong nga tion sang pandemya ang paggasto sang P14.4-Million halin sa Capital Outlay Fund para sa salakyan sang mga konsehal.
Una naman nagdepensa ang mga konsehal nga gamiton man sa official government function ang pick-up trucks kag wala man ini ginhatag kundi ginpahulam lang samtang yara pa sila sa termino.
As of press time, ang nagbaton sang Mitsubishi Strada amo sanday Councilors Atty. Romel Duron, Jojo Javellana, Rudolph Jeffrey Ganzon, Alan Zaldivar, Ely Estante, kag Lyndon Acap.
Ang mga wala nagbaton nga konsehal amo sanday Councilors Dr. Candice Tupas, Mandrie Malabor, kag Ed Peñaredondo. Apat ang wala pa nakasabat sa media kun batunon ukon indi ang pick-up trucks.
Ini amo sanday Councilors Jay Treñas, Love Baronda, kag Frances Grace Parcon. Wala man nakasabat si SK President Leila Luntao. Una naman nagdepensa si Mayor Jerry Treñas nga wala sang lamod-pamulitika sa sini nga pick-up trucks bangud para ini sa pagpasangkad sang trabaho kaangay sang pagpanagtag man sang salakyan sa mga pulis kag big bikes sa mga personnel sang Public Safety and Transportation Management Office (PSTMO).#
