𝗗𝗨𝗠𝗔𝗡𝗚𝗔𝗦, 𝗜𝗟𝗢𝗜𝗟𝗢 — Hugot ang kampanya sang Iloilo City Government, City Environment and Natural Resources (CENRO), City Agriculturist Office, kag Iloilo City Health Office sa pagpakibato batok sa makamamatay nga balatian nga dengue.
Sa interview sang Bombo Radyo kay Engineer Niel Ravena, head sang Iloilo City General Services Office (GSO), iya ginpahayag nga gina-identify na ang mga bakante nga lote agud nga malimpyohan kag indi lang para makalikaw sa lamok bangud nga posible man ini nga mahimo nga garden agud nga mabenepisyohan sang mga residente.
Suno kay Ravena, nagpatuman naman sila sang clean up drive sa pila ka bahin sang syudad agud nga indi na madugangan pa ang mangin breeding ground sang mga lamok.
Ginpahayag man sini nga may yara sila sang mga rekomendasyon sa tagsa ka barangay officials nga kon may mga goma nga indi na magamit sa ila lugar, mas makapamaayo nga ihatag nalang sa talatapan agud nga ma-dispose sang maayo.
Nagpanugyan man ang natungdan sa publiko nga kon may mga gamit ukon basura nga nabudlayan sila nga mag-dispose, gilayon nga magtawag sa ila talatapan agud nga mahatagan sang nagakaigo nga waste disposal.
