ILOILO CITY – Ginpasiguro sang probinsiya sang Antique nga mangin “wow moment” sa mga atleta kag gin-imbitar nga bisita, ang opening ceremony sang Palarong Pambansa 2017 sa maabot nga Dominggo, Abril 23, sa Binirayan Sports Complex sa banwa sang San Jose.
Sa interview sang Bombo Radyo Iloilo, ginpahayag ni Atty. Arthur Lastimoso, chairperson sang local organizing committee sang 60th Palarong Pambansa, nga madamo sila sang sorpresa nga ginhanda apang ginbag-o man ang pila ka mga tradisyon sang nasambit nga sporting event.
Suno kay Atty. Lastimoso, maga-perform sa opening ceremony ang Tribu Ttausan nga nagkampeon sa Kasadyahan Festival sa Iloilo sang nagligad nga tuig.
Nagalab-ot sa 250 ka pares sang mga bata ang magapasundayag sa dance sports samtang may yara man sang military shows.
Ang naandan nga parade of athletes ang bag-uhon man ang porma.
Ginpahayag ni Atty. Lastimoso nga kun sadto isa-isa nga nagasulod sa venue ang delegasyon sang rehiyon, subong nga tuig himuon ini nga convergence parade kun sa diin, duha ang entrance nga ibutan sa Binirayan Sports Complex agud dungan nga makasulod ang duha ka delegasyon.
Makapanubo sini sang isa ka oras sa parada sang mga atleta.
Suno kay Atty. Lastimoso, mismo si Presidente Rodrigo Duterte nga guest sa opening ceremony ng Palaro, ang naghingyo sini.
Limitado ang oras sang Presidente kag luyag nga sa ti-on sang iya speech, makasulod na sa venue ang tanan nga delegasyon.
Ang finale ang walo ka minuto nga pyro musical display kun sa diin ang music amo ang theme song sang Palaro nga “Ang Galing ng Pinoy”.