𝗖𝗔𝗟𝗜𝗡𝗢𝗚, 𝗜𝗟𝗢𝗜𝗟𝗢 — Gina-ekspektar sang mga Transport Cooperatives sa Iloilo nga magaabot ang ila dugang nga mga modernized units sa bulan sang Oktubre.
Ini kasunod man sang pagpadayon sang Public Utility Vehicle Modernization Program (PUVMP) apisar nga ginaduso sang mga senador nga suspendihon ini.
Sa interview sang Bombo Radyo kay Raymundo “Boyet” Parcon, presidente sang Iloilo City Loop Alliance of Jeepney Owners and Drivers Association (ICLAJODA), iya ginpahayag nga dako ang ila pagpasalamat sa Land Transportation Franchising and Regulatory Board (LTFRB) bangud nangin dako ang ila bulig agud ipalab-ot sa gobyerno nga indi kanselahon ang suspensyon sang amo nga programa.
Suno kay Parcon, ang amo nga ahensya ang nagaduso man Public Utility Vehicle Modernization Program agud nga mangin isa ka layi.
Ginpahayag man sini nga kon indi magdugang sang units ang kooperatiba kag masuspende ang modernisasyon, posible magtuga ini sang kakulangan sang transportasyon.
Gintumod man sang natungdan nga may yara sang 115 ka mga modernized units ang magaabot, kon sa diin, subong tani nga Agosto natalana ini maabot, apang bangud sa gindagdag nga resolusyon sang mga senador nga suspendihon ang modernization program, na-delay ini.
Ginkalipay naman sang mga kooperatiba ang pagsuporta ni President Ferdinand Marcos, Jr. sa modernisasyon apisar sang tuyo sang senado nga untaton ini.
