ILOILO CITY- Nagpauli na lang sa uma agud manggarab ang pila ka mga tricycle drivers nga nagabyahe sa Sooc,Arevalo bangud sa ginapatuman nga Local Public Transport Route Plan (LPTRP).
Sa idalom sang LPTRP, may mga jeep na nga nagabyahe sa ruta nga Sooc,Arevalo- Mandurriao and vice versa.
Sa interview sang Bombo Radyo kay Raymond Millondaga, presidente sang asosasyon sang mga tricycle drivers sa lugar, iya ginpahayag nga
sang wala pa sang nagabyahe nga jeep sadto,tag-walo ka beses ang trips sang isa ka tricycle kada adlaw apang humalin sang ginpatuman ang LPTRP, duha ka beses na lang sila makapasaka sang pasahero.
Suno kay Millondaga, tuman ini nga pagpabug-at kag pagpagutom sa ila nga pagbyahe sang tricycle lang ang palangitan-an.
Pahayag niya, sa masobra 170 ka units sang tricyle sa lugar, madamo sang nag-untat na byahe kag ang iban ang plano palang nga mag-untat.
