Magatambong na liwat ang pila ka sa Cabinet officials sa patigayunon nga Senate hearing kaangot sa pag-aresto kay former president Rodrigo Duterte.
Apang kadungan sini, ginklaro sang Malacañang nga gamiton sang mga opisyal ang ila nga executive privilege pananglitan pamangkuton sila sang sensitibo nga mga impormasyon.
Suno kay Palace Press Officer Undersecretary Atty. Claire Castro, lakip sa mahimo magtambong sa ikatatlo nga inquiry sang Senate Committee on Foreign Affairs nga pangunahan ni Sen. Imee Marcos amo ang mga masunod:
- Department of Justice Secretary Justice Jesus Crispin Remulla
- Prosecutor General Richard Anthony Fadullon
- Chief State Counsel Dennis Arvin Chan
- Department of Foreign Affairs Secretary Enrique Manalo
- Philippine Center on Transnational Crime Executive Director Anthony Alcantara
- Philippine National Police Chief Rommel Franscisco Marbil
- Criminal Investigation and Detection Group Chief General Nicolas Torre
- Department of Migrant Workers Secretary Hans Leo Cacdac
- Special Envoy on Transnational Crimes Markus Lacanilao
Matandaan nga sa una nga hearing, nagtambong man ang Cabinet secretaries, apang sa ikaduha, bakante na ang mga pulungkuan sa Senado bangud ginsiling sang Malacañang nga bastante na ang nahatag nga mga impormasyon kag gamiton na nila ang ila nga executive privilege.
Gin-abi-abi naman sang presidential sister ang pagpasugot sang Palasyo nga mag-attend na liwat ang government officials.
“Mabuti at nagdalawang-isip ang administrasyon, pero sana hudyat na ang kanilang anunsyo ng pagnanais ibunyag ang katotohanan, na sa wakas, maliwanagan ang sambayanan patungkol sa totoong mga pangyayari,” kabahin sang statement ni Imee.
Marso 11 sang gin-aresto si Duterte sa gahum sang arrest warrant sang International Criminal Court bangud sa “crimes against humanity” nga nag-ugat sa drug war.
Nagapabilin ini subong sa The Hague, Netherlands kag naka-schedule naman ang confirmation of charges sa Septyembre 23, 2025.
