ILOILO CITY – Ginpasirado na ang pila ka mayor nga dalanon sa siyudad sang Iloilo samtang nagpatuman man sang re-routing sa mga pampubliko nga salakyan.
Ini matapos ginsuguran na ang konstruksyon sang mga judging stage para sa Dinagyang Festival 2018.
Sa interview sang Bombo Radyo Iloilo, ginpahayag ni Jeck Conlu, pinuno sang City Public Transportation and Management Office nga sumugod subong nga adlaw, indi na maagyan ang mga dalanon kun sa diin may ginpahamtang nga stage lakip na ang atubang sang Iloilo Freedom Grandstand, old provincial capitol, corner Mabini-Delgado Street, Quezon-Ledesma Street kag Maria Clara sa City Proper area.
Sumugod alas-7:00 sang gab-i tubtob alas-5:30 sang kaagahon, gamiton ang nasambit nga mga dalanon para sa blocking sang mga tribu nga nagapasakop sa Kasadyahan Festival kag Ati Tribe Competition.
Suno pa kay Conlu, nagpatuman na sang re-routing kag nagpahamtang sang tarpaulin sa mga terminals agud ipahibalo ang road closures sa siyudad bangud sang Dinagyang Festival.