BAHRAIN – Masobra na sa apat ka bulan nga wala sang sweldo ang mga nagatrabaho sa restaurant sa Bahrain bangud sa Coronavirus Disease 2019 (COVID-19) pandemic.
Suno kay Bombo International Correspondent Lovelyn Joy Gierza, amat-amat pa lang nga ginpahalugan ang quarantine restrictions sa nasambit nga island nation.
Ginpahayag ni Gierza nga bukas naman ang mga kalan-an apang limitado lamang sa take-out kag delivery ang serbisyo rason nga ang iban sa mga empleyado ang wala anay ginpabalik sa trabaho.
Ginalauman nga sa una nga semana sang Agosto, pahanugutan na ang dine-in services apang sundon sa gihapon ang minimum health standards.
Apisar nga wala sang may nabaton nga sweldo sa nakaligad nga binulan, ginpahayag sang natungdan nga indi gid madula ang Bayanihan spirit sang mga Filipino.
Sa subong, naglab-ot sa 38,458 ang COVID-19 cases sa Bahrain, 34,826 ang naka-recover kag 136 naman ang ginbawi-an sang kabuhi.
