Gusto sang pila ka mga senador nga dugangan sang gamay ang budget sang Office of the Vice President (OVP) para sa 2025.
Ginpahayag ini ni Senator Juan Miguel Zubiri apang nag-ako nga “premature” pa subong nga ihambal kun ano gid ang matabo sa pondo ni Vice President Sara Duterte.
“We have several colleagues that have already said that they want to increase the budget allocation. Yung appetite ng ibang senador is dagdagan pa nang kaunti,” suno kay Zubiri sa Kapihan sa Senado.
Nagtambong man si Sara sa Senate briefing suno kay Zubiri kag nasabat man sini ang mga pamangkot sang mga senador baliskad sa ginpakita sini sa panel sang Kamara nga wala nagsumpa, nag-una sa paghalin, kag sang ginhatagan sang tyansa nga depensahan ang proposed budget, wala siya gihapon nagkadto.
“In fairness, dito nag attend po siya. And she answered questions raised by some of our senators. She was very engaging with the senators, so walang problema,” dugang sang anay senate president.
Matandaan nga antes nag-adjourn ang Kamara kag antes sini ginpasar ang 2025 budget sa third and final reading, nagdesisyon ang mga mamalidha nga himuon na lamang nga P733-million ang pondo sa opisina ni Sara.
Gin-cite nga rason ang pagpamalibad sini nga magsabat sa mga pamangkot pati na sa paggamit sang confidential funds.
Nahibaluan nga may bicameral conference sa tunga sang pila ka mga senador kag kongresista nga amo ang maga-hitso sa mga deperensya sa pondo nga natalana nga ihatag sa opisina sang bise-presidente.
