Duha-duha pa kun makaupod ang Barangay Ginebra stars nga sanday Scottie Thompson kag Japeth Aguilar sa Gilas Pilipinas sa Southeast Asian Games sa Cambodia.
Suno kay national team coach Chot Reyes, posible nga wala si Thompson bangud dungan ang regional games sa ginalauman nga pagbun-ag sang iya asawa nga si Jinky.
Si Aguilar naman ang wala pa gihapon naka-recover sa knee injury nga amo ang rason kun ngaa missing ini sa 15 games sa Philippine Basketball Association (PBA) Governors’ Cup.
Sa bahin ni June Mar Fajardo, sigurado na suno kay Reyes nga indi ini makaupod sa SEA Games bangud sa knee injury nga naangkon sang naghampang ini para sa San Miguel sa East Asia Super League sang Marso kag wala na sang partisipasyon sa ulihi nga bahin sang Beermen sa PBA Governors’ Cup.
Mangin si Barangay Ginebra forward Jamie Malonzo kag TNT guard kag reigning PBA Finals Most Valuable Player Mikey Williams ang indi man makaupod sa national team bangud sa personal commitments.
Magasulod ang Gilas sa training camp sa Inspire Sports Academy sa Calamba, Laguna sa Domingo, Abril 30, antes maglupad ang team sa Cambodia sa Mayo 6.
Ang SEA Games basketball competition ang pagahiwaton halin sa Mayo 9-16.
