Nagdepensa si former Philippine National Police (PNP) chief kag subong Senator Ronald “Bato” Dela Rosa nga “lahog” lamang ang pila sa ginpahayag ni former President Rodrigo Duterte sa atubang sang mga senador sang ginpatigayon ang drug war hearing sang nagligad nga Lunes.

Ini apisar yara man mismo si Bato sang nagtindog si Duterte kag nagsumpa nga kamatuoran lamang ang iya ihambal sa Senado.

Lakip sa ginhambal ni Duterte amo nga nagmandu siya sa mga pulis nga i-encourage ang drug suspects nga magbato para nga may rason ang otoridad nga patyon sila.

Ginmensyonar man sini nga ang anay chiefs sang PNP sa idalom sang iya termino ang nagpamuno mismo sang death squad — lakip na si Bato.

“Basta, as far as I am concerned, I know 100 percent no’ng sinabi niya na ”Yung mga chief of police ko diyan dati, yung Chief, [Philippine National Police] na ‘yan, nandyan sa kanan ko, mga miyembro o mga leader’ yan ng DDS’. Alam ko nagbibiro siya,” suno kay dela Rosa nga nagpungko man anay bilang Davao City Police chief.

Indi ini ang una nga bes nga ginrason sang kampo ni Duterte nga nagalahog lang siya sa iya mga statement. Sang tion nga siya ang presidente, sa kada kontrobersyal nga statement, nagarason ang iya spokespersons kag officials nga “joke” lamang ini.

Dugang ni Bato, pamahog lamang sa mga kriminal ang statement ni Duterte nga i-encourage sila sang mga pulis nga magbato para sila ang mapatay sa police operations.

“As I have said, puro panakot niya ‘yan sa kriminal. Puro panakot niya ‘yan,” dugang sini.

Pagkatapos sang appearance ni Duterte sang Lunes, nagpahayag man ang House quad comm nga imbitaran man nila ang former president sa hearing sa Kamara sa Nobyembre 7.#