Nagsugtanay ang Pilipinas kag China nga padayunon sang Philippine government ang implementasyon sang rotation and resupply (RORE) missions sa BRP Sierra Madre sa Ayungin Shoal ukon Second Thomas Shoal sa West Philippine Sea.
Kabahin ini sa provisional agreement nga pirmado sang Hulyo 2024 agud malikawan ang gamo kag tensyon kaangay sang natabo sang Hunyo 17, 2024 kun sa diin may isa ka tropa sang Pilipinas nga nautdan gid sang tudlo.
Ang BRP Sierra Madre isa ka World War II-era vessel nga ginbutang sang Pilipinas sa Ayungin Shoal halin sang 1999 agud magbantay bangud sa pag-akupar sang China sa Mischief Reef sang 1995. Tubtub subong, didto ini naka-posisyon kag may ginapatigayon lamang nga resupply missions agud mahatagan sang ila kinahanglanon ang tropa.
Sa 10th Bilateral Consultation Mechanism sang duha ka pungsod sa Xiamen, Fujian sa China nga ginpatigayon subong nga adlaw, nangin kaundan man ini sa gin-istoryahan sang senior Philippine kag Chinese diplomats.
Suno sa Department of Foreign Affairs (DFA), nag-atubangay sanday Foreign Affairs Undersecretary Ma. Theresa Lazaro kag Chinese Vice Foreign Minister Chen Xiaodong kun sa diin natabo ang prangka nga mga diskusyon sa mga isyu sa West Philippine Sea.
Base sa DFA, ginplastar ni Lazaro nga klaro kag wala sang pagbag-o ang panindugan sang Pilipinas sa teritoryo sini, apang bukas man ini sa mga kaangay sini nga dayalogo para nga maresolba ang mga indi paghangpanay.
“The two sides exchanged views on the Provisional Understanding on the Philippines’ rotation and reprovisioning (RORE) missions to BRP Sierra Madre in Ayungin Shoal, acknowledged its positive outcomes, and agreed to continue its implementation to sustain the de-escalation of tensions without prejudice to respective national positions,” kabahin sang statement sang ahensya.
Ginpahayag nga nagsugtanay ang duha ka mga pungsod nga padayunon ang RORE missions agud nga ma-sustiner ang pagpanubo sang tensyon.
Ginpalab-ot man ni Lazaro sa Chinese diplomat ang posisyon ni President Ferdinand Marcos Jr. nga committed ang Pilipinas sa malinong nga resolusyon sa mga gamo sa teritoryo paagi sa dayalogo kag diplomasya.
Natalana nga mag-host ang Pilipinas sa masunod nga meeting ukon ang 11th Bilateral Consultation Mechanism apang wala pa na-anunsyo ang petsa.#
(Photo by JAM STA ROSA / Agence France-Presse)
