Pinakauna nga kahigayunan sa maragtas sang high school debates sa bilog nga kalibutan nga nakuha sang isa ka Filipino ang ‘gold medal’ sa ginakonsidera bilang Olympiada sang high school debates.
Ginpangalanan ang estudyante nagikan sa Baguio bilang ”world’s best high school debater.”
Siya amo si Robert “Toby” Leung, Grade 12 student sang Philippine Science High School – Baguio Campus, nakakuha sang Overall Best Speaker title.
Nakuha ni Leung ang average nga 73.17 speaker points sa (8) ka preliminary debate rounds kag nagpanguna sa 372 ka mga estudyante halin sa nanuhay-tuhay nga pungsod lakip na sa mga estudyante nga kilala bilang debate powerhouses nagikan sa Canada kag Singapore.
Nahibaluan nga ang World Schools Debate Championships (WSDC), ang ginakonsidera bilang ‘Olympics of high school debate’ sang debate societies, isa ka annual global debate competition nga nag-umpisa sang 1988.
Diri ginagamit ang World Schools format — isa ka global standard para sa high school debating.
Magluwas sa gold medal, nakuha man sang pungsod ang ‘bronze medal’ sa semifinals sa ika-duha nga kahigayunan humalin sang 2012.
Nakarekord ang Pilipinas sang 6 ka daog kag 2 ka pyerde sa 8 ka preliminary rounds kag yara sa rank 3 sa knockout rounds.
Gin-atubang kag ginlutos sang pungsod ang Czech Republic sa pre-octos, India sa octofinals, kag Romania sa quarterfinals tubtob nalab-ot ang semi-finals kag gin-atubang ang Hongkong sa debate topic nga may titulo nga “This House supports an individual carbon credit.”
Tatlo pa ka myembro sang Philippine high school debate team ang nahatagan sang best speaker awards sa 2021 edition sang WSDC.
Ini amo sanday David Bloom, halin sa International School of Manila, kag gin-awardan sang 4th Best Speaker, Jake Peralta, sang Southridge High School, gin-awardan sang 6th Best Speaker kag Riva Fong, halin sa De La Salle Zobel, gin-awardan sang 11th Best Speaker.
