Gindumilian sang Pilipinas ang pagsulod sang imported nga karne sang baboy halin sa Espanya bangud sa outbreak sang African swine fever (ASF).
Suno kay Agriculture Secretary Francisco Tiu Laurel Jr., nag-umpisa ang ban sang Nobyembre 11 kag magalawig tubtub nga makumpirma nga wala na sang kaso sang ASF ang amo nga pungsod.
Ginsiguro sang tiglikom nga indi maapektuhan sang import restriction ang local pork supply.
Pahayag sini, puno pa subong ang tanan nga cold storage facilities sa Pilipinas samtang stable naman ang retail prices sa mga mercado.
Dugang niya, reasonable man ang presyo sang karne sang baboy subong nga Christmas Season; apang bangud sa demand, posible nga may gamay nga pagsaka.
Sandig sa data sang Bureau of Animal Industry, nakapasulod ang Espanya sang 132.05 million kilograms sang karne sa Pilipinas sang Enero tubtub Septyembre subong nga tuig nga naga-reflect sang 11.1-percent nga market share.
Nahibaluan nga ang Espanya amo ang nagapangaduha sa Brazil sa pinakadaku nga source sang Pilipinas sang karne sang baboy.
.){kind=link}