Ginatun-an sang gobyerno sang Pilipinas ang deklarasyon sang State of Economic Emergency bangud sa impact sang sunod sunod nga pagsaka sa presyo sang produktong petrolyo bangud sa nagapadayon nga Russia-Ukraine crisis.
Suno kay acting Presidential Spokesperson Martin Andanar, nagpalab-ot sang proposal ang economic team ni Presidente Rodrigo Duterte sang pila ka mga government interventions agud nga mahagan-hagan ang epekto sang padayon nga pagsaka sa presyo sang produktong petrolyo.
Dugang pa sini, ang “full blown war” ukon “world war” amo ang magatulod sa deklarasyon sang state of economic emergency.
Nahibaluan nga nagpa-in na ang gobyerno sang P2.5 billion nga fuel subsidy para sa mga drivers kag operators sang mga Public Utility Vehicles (PUV) kag P500 million naman para sa mga mangunguma kag manugpangisda agud nga mahagan hagan ang epekto sa ila pangabuhian.
Suno naman kay National Economic and Development Authority (NEDA) undersecretary Rosemarie Edillon, ila ginakonsiderar ang mas mataas pa nga tax collection subong nga Marso agud mas mapadako ang pondo sa fuel subsidy nga P5 billion kag P1.1 billion naman sa agricultural works.
