Nagapangaduha ang Pilipinas sa pinakamalipayon nga mga pungsod sa Southeast Asia.
Base ini sa “2024 World Happiness Report” nga gin-edit ni Professor Jan-Emmanuel De Neve, isa ka expert sang economics kag behavioral science sa University of Oxford kun sa diin ang resulta ang ginbalhag sang nagligad nga Marso 20.
Sa amo nga report, ang Singapore ang nakakuha sang pinakamataas nga puwesto sa Southeast Asia region.
Nagapang-53 naman ang Pilipinas sa bilog nga kalibutan nga mas mataas ipaanggid sa ika-76 nga nakuha sang nagligad nga 2023.
‘Generally happy’ ang paglaragway sang mga Pinoy sang ginhingyo nga i-rate ang ila kabuhi sa scale sang 1-10. Ang average score sang kada pungsod ang na-calculate base sa ratings sa sulod sang nagligad nga tatlo ka tuig.
Ginbase ang report sa self-reported data halin sa mga tawo nga na-survey sa kada pungsod.
Yari naman ang ranking sa iban nga pungsod sa Southeast Asia: Vietnam (54th); Thailand (58th); Malaysia (59th); Indonesia (80th); Laos (94th); Myanmar (118th); kag Cambodia (119th).
Nagpang-60 naman ang China, pang-51 ang Japan, kag pang-52 ang South Korea.
Yari naman ang Top 10: Finland, Denmark, Iceland, Sweden, Israel, The Netherlands, Norway, Luxembourg, Switzerland, kag Australia.Ang Finland nga puluy-an sang 5.5 million nga mga tawo amo ang gina-report nga “happiest” country sa nagligad pa nga pito ka tuig.
Sandig pa sa amo nga report, ang 10 ka mga pungsod sa pinakaidalom sang ranking amo ang: Yemen, Zambia, Eswatini, Malawi, Botswana, Zimbabwe, Congo, Sierra Leone, Lebanon kag Afghanistan.#
(Photo: We the Pvblic)
