Gin-anunsyo sang Department of Foreign Affairs (DFA) nga may nakasugtan na ang Pilipinas kag China nga “arrangement” agud nga malikawan ang anuman nga tensyon kun magpatigayon sang rotation and reprovisioning (RORE) missions sa Ayungin Shoal.
Wala pa ginpatpat sang ahensya ang mga detalye kaangot sa sini nga kasugtanan, apang ginsiling nga pareho nga ginkilala sang duha ka nasyon ang pagkinahanglan nga panubuon na ang tensyon sa amo nga teritoryo sa West Philippine Sea kag dapat nga magpatigayon sang dayalogo kag konsultasyon agud nga ma-settle ang mga indi paghangpanay.
“The Philippines and the People’s Republic of China have reached an understanding on the provisional arrangement for the resupply of daily necessities and rotation (RoRe) missions to the BRP Sierra Madre in Ayungin Shoal,” kabahin sang statement sang DFA.
Ini nga tikang ang kasunod man sa natabo nga high-level meeting sa Manila sang Hulyo 2 — ang Bilateral Consultation Mechanism (BCM) — nga gintambungan nanday Philippine Foreign Affairs Undersecretary Ma. Theresa Lazaro kag Chinese Vice Foreign Minister Chen Xiaodong kun sa diin nakasugtan nga magpangita sang “mutually-acceptable resolution to the issues” sa pihak sang “significant differences” sa mga posisyon sang Pilipinas kag China.
Hunyo 17 sang natabo ang ginakabig pinaka-agresibo nga pagpang-balabag kag pagpang-harass sang Chinese personnel sa mga Pilipino sa Ayungin Shoal. Sang amo nga tion, nagapatigayon ang Filipino troops sang RORE mission apang ginbanggaan sang China Coast Guard, ginbungguan, ginguyod, kag ginsian ang ila sakayan, ginpangguba ang equipment, ginhanaan sang patalom, kag ginkawat pa ang mga armas nga dal-on kuntani sa warship nga BRP Sierra Madre.
Sang amo man nga tion, nautdan pa sang tudlo ang isa ka Philippine Navy personnel — mga hitabo nga ginkondena sang nagkalain-lain nga mga pungsod kag gintawag sang gobyerno sang Pilipinas nga “iligal” apang indi pa man “armed attack.”
