Ginlunsyar sang Pilipinas kag Estados Unidos ang “Task Force Philippines,” isa ka bilateral initiative nga nagatuyo pabaskugon ang kooperasyon batok sa pamahog sa seguridad kag mga akto sang kalakasan sa Indo-Pacific region.
Ini ang gin-anunsyo nanday U.S. Secretary of War Pete Hegseth kag Defense Secretary Gilberto Teodoro Jr. sa sideline sang ASEAN Defense Ministers’ Meeting (ADMM)-Plus sa Malaysia.
Suno kay Hegseth, nagapabilin nga mapag-on ang alyansa sang Pilipinas kag U.S., nga ginatukuran sang Mutual Defense Treaty, kag pareho sila nga nagakabalaka sa ginahimo sang China sa West Philippine Sea, ilabi na sa Scarborough Shoal.
Samtang, ginpabutyag ni Teodoro nga ang pagdepensa sa international law, freedom of navigation, kag sovereignty importante indi lang sa Pilipinas kundi para man sa bilog nga kalibutan.
Sa pihak nga bahin, nag-abot sa Manila ang HMNZS Aotearoa, ang pinakadaku nga barko pandagat sang New Zealand, para sa tatlo ka adlaw nga goodwill visit kag joint exercises upod sa Philippine Navy.
