ILOILO CITY – Kinahanglan nga mangin mahinalungon ang gobyerno sa pagbaton sang mga ginatanyag kag ginapapa-utang nga kwarta sang China sa Pilipinas.
Ini ang pagpahayag ni anay Department of Foreign Affairs Secretary Perfecto Yasay Jr.
Sa interview sang Bombo Radyo kay Yasay, iya ginpahayag nga indi niya ma garantiya sang 100% kun bala “Debt trap” ang ginahimo sang China sa Pilipinas pinaagi sa pagpahulam sini sang kwarta sa gobyerno.
Ang importante suno kay Yasay amo nga mag-aligmat ang gobyerno agud nga indi maglab-ot sa punto nga malubong sa utang ang Pilipinas.
Sa pagkahibalo sang natungdan, wala pa ma implementar sang gobyerno ang mga loans halin sa China.
Pahayag niya, kun luyag sang China kag Pilipinas nga mangin abyan, kinahanglan nga may yara sang mutual trust.
Dako man ang pagsalig ni Yasay nga gina-review sang economic managers sang Duterte Administration ang mga ginatanyag sang China nga bulig pinansyal sa pungsod.
