Maga-export na liwat ang Pilipinas sang raw sugar sa Estados Unidos sang Amerika sa Agusto — halos apat ka tuig matapos ang katapusan nga shipment sini sang kalamay sa amo nga pungsod.
Suno kay Sugar Regulatory Administration (SRA) administrator kag CEO Pablo Luis Azcona, ini nga tikang amo ang sabat sa hingyo sang exporters kun mahimo na sila makapadala sang suplay.
Sang Marso, matandaan nga gin-anunsyo sang US Trade Representative (USTR) nga nagpain ini sang dugang nga 25,300 metric tons raw value (MTRV) para sa Pilipinas para sa fiscal year 2024 (October 1, 2023 – September 30, 2024).
Suno kay Azcona, magaabot sa US ang raw sugar sa Septyembre gani ginalauman nga Agusto pa lang, umpisahan na ang proseso sang pag-export.
Ang plano sa pag-export ang iga-implementer paagi sa sugar order nga subong nga bulan pa madesisyunan.
Matandaan nga katapusan nga naka-ship ang Pilipinas sang kalamay sa US sang crop year 2020–2021 sang nagdangat sa 112,008 MT sang commercial raw sugar ang ginpadala.
Nagaplano man ang Pilipinas nga mag-import sang ginabanta nga 200,000 MT sang refined sugar subong nga tuig agud nga ma-fill in ang gina-antisipar na nga supply gap kag agud masigurado nga mapabilin ang price stability sang amo nga produkto.
