Nadag-an sang Pilipinas ang bidding sa pag-host sang Federation Internationale de Volleyball (FIVB) Men’s World Championship sa masunod nga tuig!
Patigayunon ang daku nga hinampang sa Septyembre 12-28, 2025 kun sa diin personal nga masaksihan sang mga Pinoy ang pag-abot kag pagpaindis-indis sang 32 ka best men’s team sa bilog nga kalibutan.
Sanday Senator Pia Cayetano kag Philippine National Volleyball Federation president Ramon Suzara ang nagpanguna sa bidding delegation sang Pilipinas sang gin-award na ang bidding rights sa official ceremony sa FIVB general headquarters sa Lausanne, Switzerland, Myerkules sang gab-i (oras sa Pilipinas).
Suno kay FIVB president Dr. Ary Graca, ini nga prestihiyoso nga event ang wala lamang nagatuyo nga maka-inspire sa masunod nga henerasyon sang atleta kundi ma-engganyo man ang partisipasyon sa sports sa tanan nga lebel sa Pilipinas kag sa mas masangkad nga mga rehiyon.
“We are confident that the Philippines, supported by our innovative Volleyball Empowerment programme, will host an extraordinary World Championship that will leave a lasting legacy and help to cultivate an even brighter future for our sport globally,” dugang ni Graca.
Nagsabat naman ang Pilipinas paagi kay Suzara nga preparado ang team sang pungsod nga mag-host sang championship.
“For this, I am ready, our team is ready, the Philippines is ready to boldly face the challenge and to fulfil the dream, as we work collectively to serve volleyball. If you love volleyball then you will surely love the Philippines. See you all in 2025,” pahayag ni Suzara.
Matandaan nga pormal nga ginlunsar sang Pilipinas ang bid sini sang nagligad nga Pebrero kasunod sang hosting sang Volleyball Nations League (VNL) sang 2022 kag 2023 sa Smart Araneta Coliseum kag Mall of Asia Arena — venues nga amo man ang posible gamiton para sa World Championship.
