Napilian ang Pilipinas nga mag-host sang 2024 Asian Volleyball Confederation (AVC) Challenge Cup for Women sa Mayo 22-29.
11 ka Asian teams lakip na ang Pilipinas bilang host nation ang magapaindis-indis sa Challenge Cup.
Ulihi ini nga nadag-an sang Vietnam sang 2022 kag una nga nadag-an sang Hong Kong sa inaugural staging sang tournament sang 2021.
Bangud nagapadayon pa subong ang professional kag collegiate volleyball tournaments sa pungsod, ginalauman nga mahingadlan ang women’s national team roster sinemana antes ang kumpetisyon.
Indi pa subong klaro kun ang magabug-os sa Philippine team ang lunsay halin sa kolehiyo ukon may pilion man halin sa Premier Volleyball League (PVL) stars ukon kumbinasyon sang mga estudyante kag professional.
Sa inisyal nga impormasyon, hiwaton ang Challenge Cup sa Rizal Memorial Coliseum sa Manila.
Madumduman nga sa labing-una nga pagpasakop sang Pilipinas sang nagligad nga tuig, ang Akari Chargers nga ginpangunahan sang anay national team head coach nga si Jorge Souza de Brito ang gin-tap agud magtiglawas sa pungsod nga may reinforcements halin sa iban nga professional volleyball players kag collegiate teams.
Tatlo ka daog ang nakuha sang nationals kag apat ka kalutusan, lakip ang four-set win batok sa Uzbekistan agud makuha ang pagpito nga pwesto sa 11-team field.
