Gin-anunsyo sang FIFA nga ang Pilipinas ang napilian nga mangin host sang labing-una nga Futsal Women’s World Cup nga natalana sa 2025.
Ginkumpirma ini sang council kadungan ang 74th Congress sang Federation sa Bangkok, Thailand.
Kabahin ini sang 2026-2029 Match Calendar sang FIFA para nga matib-ong pa ang women’s game.
“The Women’s International Match Calendar and the subsequent amendments to our regulations represent an important milestone in our pledge to take the women’s game to the next level by enhancing competitiveness across the world, particularly in those regions where women’s football is less developed and protecting the well-being of the players. Having agreed the calendar well in advance will be beneficial for planning purposes,” kabahin sang statement ni FIFA President Gianni Infantino nga gin-release sang FIFA.
Suno sa football body, may yara sang 16 teams nga maga-compete sa tournament kun sa diin tatlo ang magahalin sa Asian Football Confederation kag isa naman sa host country.
Nahibaluan nga nagapang-61 ang Pilipinas sa Futsal Women’s Rankings.
Sang nagligad nga tuig, may international appearance ang Pilipinas sa Women’s Tri-Nation Futsal Invitational 2023 sa Ninoy Aquino Stadium kun sa diin nakatapak ang team sa finals apang nagpangaduha lamang matapos nalutos sang Indonesia sa katapusan nga hampang, 5-2.
