Maga-import ang Pilipinas sang 16,000 metric tons sang fresh yellow onions subong nga tuig agud masigurado nga bastante ang suplay sini nga produkto para sa holiday season.
Suno kay Agriculture Secretary Francisco Tiu Laurel Jr., naaprubahan na niya sang nagligad pa nga Lunes ang memorandum sa issuance sang sanitary kag phytosanitary import clearance para sa natalana nga importasyon.
Ginsaad nga rason ang kakulangan sang suplay sa pungsod nga 3,296.50 MT nga naglab-ot lamang sang Domingo, Agusto 25.
Maga-abot ang imports sa kada batch sa kada duha ka semana.
Suno pa sa tiglikom, ang una nga hugnat ang mapasulod na diri sa Pilipinas sa sini nga weekend ukon sa temprano nga bahin sa masunod nga semana.
Ginplastar man sang Bureau of Plant Industry (BPI) nga ang katapusan nga batch sang imports ang magaabot sa katapusan nga bahin sang Disyembre agud nga indi man tuman nga maapektuhan ang local producers nga magasugod na sa pag-harvest sa Enero 2025.
Sa pihak nga bahin, base sa report sang BPI nga napetsahan sang Agusto 14, may yara pa sang 135,551.40 MT nga available stock sang red onions kag ginabanta nga magalawig pa tubtub sa Marso 2025.
Kun matandaan, ginpalawig sang ahensya ang import ban sa pula nga sibuyas tubtub sa Agusto.
Sang nagligad nga tuig, napuno sang pagpakamalaot ang Marcos Jr. administration bangud sa pagtimbuok sang presyo sang bombay sang hingapusan sang 2022 kag entrada sang 2023 bangud sa ginapahayag nga miskalkulasyon sa demand kag suplay, atrasado nga imports, smuggling, kag kakulangan sang kinahanglanon gid kuntani nga cold storage facilities.
